Moun - Revue de philosophie 1 (2005) 115-120
KIJAN FILOZÒF YO DWE EKRI
Jacques Maritain
Jacques Maritain, Reflexions sur l'intelligence, Appendice I : "Sur
le langage philosophique", (1924) in Jacques et Raïssa Maritain,
Oeuvres complètes, Fribourg, Editions universitaires / Paris, Editions Saint-Paul 1985, vol. III, pp. 385-390
Traduction de P. Maurice Elder Hyppolite, sdb
OSIJÈ LANGAJ FILOZOFIK LA
Kijan filozòf yo dwe ekri?
[…]
I.- Mwen konsidere se yon bagay ki klè filozofi a pa ka sèvi ak
langaj nenpòt ki moun pale a. Menm jan tou yo pa ka realize yon
èv atistik ak nenpòt ki mwayen, sa vle di san zouti oubyen teknik
ki koresponn a sa yo vle fè a. Pa gen okenn syans, okenn disiplin
ki ka mache san yon vokabilè spesyal, donk mwen pa wè poukisa
yo ta refize bay filozofi a sa yo bay matematik la san difikilte,
oubyen chimi an, oubyen menm teknik yon kòdonye ak yon boksè.
Disip Descartes yo, epi apre yo zanmi limyè yo, te mande
filozofi a pou l' pale langaj nenpòt ki moun paske yo te konsidere
bon sans natirèl la te ase pou dekouvri epi tabli group verite ki pi
ro yo. Deroulman istwa a tapral demanti konsepsyon natirèl (natiralist) rasyonalis sa a. Syans eksperimantal yo te rive progrese jan
yo te fè l' nan tan modèn yo paske yo te vin tounen teknik epi,
devan yo, bon sans Descartes la vin parèk chak fwa trò kout e
menm initil. Kanta pou filozofi a menm, apre ideològ yo fin fatige l', li pral reprann fòs sèlman lè li pral tonbe anba disiplin ak
bonèt doktoral la gras a Kant (e se pa ti bonèt!). Konsa depi nan
finisman 18èm syèk la se teknisyen yo ak spesyalis yo ki vin tire
revanch yo sou moun onèt ki te kapab konn tout bagay yo…
Revanch sa a te nesesè, men li rive nan yon bann eksè ki
pa gen sans, paske se sèlman sou realite materyèl la li te fèt. Depi
Rabelais rive sou Molière, literati klasik nou an te pase teknisyen
skolastik yo nan jwèt; nou ka di syèk syantis la ak pedantri filozofik la, sa vle di syèk Hegel, Spencer ak Durkheim nan, tire bon
vanjans pou skolastik la.
Sa fèt konsa paske an realite si syans la egzije yon vokabilè spesyal se paske toudabò li egzije kichòy ki pi fon e ki pi
spirityèl: li egzije prezans yon kalite (e[xij, habitus) nan entèlijans
la, ki detèmine oubyen leve entèlijans la anlè parapò a yon objè
spesyal ki spesyalman difisil, donk ki mande pou konsèp yo fòje
spesyalman epi ajiste yon fason pou yo byen marye ak posibilite
konesans (scibilité) ki pou objè a an patikilye. Men, depi Descartes, filozòf modèn yo te nye kalite sa yo m'ap pale a, yo vin spesyalize yo teknikman nan domèn materyèl langaj la, ak metòd yo,
ak zouti yo sèvi, men yo pa fè l' nan domèn habitus spirityèl la,
domèn lavi enteryè a.
Enkoerans ak progrè san rete spesyalizasyon sa a ki tankou yon mons, se la li soti.
II.- Filozofi a, ann di pi byen toujou, metafizik la, se yon sajès. Li
gen yon objè ki inivèsèl, kifè tout moun, omwen tout moun enstwi,
bezwen li. Se pou sa nou gen tandans mande l' plis pase lòt
disiplin yo, epi swete li monte pi ro pase limit kwense langaj teknik la. Sètènman, paske li se yon sajès, li pa fèmen anndan limit
frontyè sa yo, paske saj la, li wè tout bagay nan yon gade tou senp,
nan de twa prensip ki depase tout teknik.
Men filozofi a se yon sajès yo aprann tankou yon syans, se
paske li se syans ki pi ro a, ki fè li se yon sajès. Poutèt sa, paske li
etidye objè ki pi ro a, ki pi difisil la, li egzije nan sa ki anvi posede
li a, fòmasyon entèlijans ki pi ro a, ki pi difisil la, donk yon kantite
konsèp ak mo ki oblije spesyalize. Se sèlman lè l' fin grenpe pant
ki plen ròch ak pousyè a li rive nan pwent tèt mòn ki lib yo.
- Men èske m' pa t' di tout moun bezwen filozofi a, antouka moun ki enstwi yo?
- Mwen te di l', men mwen pa t' di tou fòk tout moun enstwi ta filozòf; depi yo resevwa ansègnman ki fòme entèlijans yo
gras a filozofi a, se deja sa.
- Men kouman y'ap fè resevwa l' si yo menm yo pa ka
antre nan jwèt la?
- Pou problèm sa a, yon sèl solisyon mwen konnen, se sa
ansyen filozòf yo te konn fè a : akote èv syantifik ki gen tout demonstrasyon yo, sa yo ekri sitou pou teknisyen yo, li ta bon tou
pou filozòf la prezante fwi travay li yo bay piblik ki enstwi a, bay
"nenpòt ki moun", antan li sèvi ak yon stil esplikasyon ki pap depann ankò de efò pou konvenk moun nan (sa Aristòt te rele
dyalektik la), men k'ap chèche fè jèmen nan nanm nan yon opinyon veridik plis pase yon syans. Se rezon sa a ki fè Platon ak
Aristòt te ekri dyalòg yo te ekri yo.
Nou dwe di tou, si li difisil pou rive genyen bon kalite
("vertu") entelektyèl metafizisyen an, li relativman pi fasil pou
rive gen vokabilè spesyal ki nesesè pou suiv li (nou sipoze se yon
metafizisyen tout bon vre) pase pou nenpòt lòt syans pi materyèl
tankou medsin pa egzanp, epi sa ki pa spesyalis yo ka aprann li san
problèm.
III.- Ki limit yo dwe bay "jagon" filozofik la? Limit sèvis li dwe
reyèlman rann yon panse k'ap pran modèl li sou bagay yo yon
fason onèt. Sou pwen sa a, skolastik la, malgre kèk aparans, malgre sitou anpil medizan mal palan, li ba nou yon bèl egzanp sa yo
rele "sobriété" lè w' konpare l' ak sistèm ki te alamòd nan 19èm
syèk la.
Ansyen filozòf yo te gen yon gran respè spesyalman pou
langaj pèp la ("vulgaire" = langaj nenpòt ki moun nan), yo te konsidere l' tankou siboua ("pyxide" = rézèv manje) sajès ki komen
pou tout imanite a, e lè yo t'ap pran yon mo pou ba l' yon sans
syantifik, yo te toujou fè referans toudabò a sans primitif li, premye sans li, sans kote li plen ak tout richès sa moun ye a. Konsa,
menm jan refleksyon ki pi delika yo t'ap fè yo, te nan lign bon
sans komen an, konsa tou leksik ki pi teknik yo t'ap sèvi ak li a
te nan lign analoji sans mo a te deja genyen an epi etimoloji mo
sa yo, omwen sa yo te sipoze a. Respè tout bon sa a pou lanjaj
komen an, - kontrèman a sa anpil filozòf modèn panse, sa yo ki
kwè tankou Samuel Butler "mo yo se ròch k'ap fè moun bite sou
rout verite a", - se respè sa a sèl, dapre mwen ki ka kenbe jagon
filozofik la nan mezi ak nan ekilib li bezwen an.
IV.- Gen yon vèbyaj byen lèd ak yon veritab konfizyon lang yo
ki sèl chèf kounye a nan filozofi a epi ki fè chak mo tounen "yon
nich kontradiksyon", [Constant Bourquin] gen rezon denonse l'.
Yo soti nan yon mal ki pi fon ki se konfizyon ant doktrin yo ak
yon kontradiksyon inivèsèl ant youn ak lòt. An realite se ta pèn
pèdi pou ta panse yon pakèt doktrin ki opoze fondamantalman
youn ak lòt ta rive gen yon menm leksik komen ki ta ase pèfeksyone pou yo tout sèvi ak li: paske langaj filozofik la menm se
yon langaj teknik, li koresponn obligatwaman a yon konbinezon
konsèp byen detèmine, epi elaborasyon sa a menm chanje dapre
divès doktrin yo.
Epi, fò m' ajoute - sa a pi enpòtan toujou - : menm anndan yon sèl doktrin nan, se ta pèdi tan pou nou ta reve gen yon
vokabilè filozofik ki fiks nèt ale. Se yon bagay ki natirèl pou mo
yo vwayaje, dapre egzijans refleksyon an, sot nan yon sans al nan
lòt, oubyen nan yon menm lign, oubyen antan yo sote, oubyen antan yo detire, oubyen antan yo kwense kò yo san rete. Varyete
sans sa yo ak mouvman elastik sa a gen enkonvegnan, sètènman,
sitou pou moun ki konsidere reflechi se yon gro fatig, men sa
prouve kijan okenn sistèm sign materyèl pa janm fin apwen nèt epi
sa montre feblès esansyèl yon espri ki oblije sèvi ak sistèm sign sa
a pou l' avanse, pou l' fè progrè; tout efò nou ta kapab fè pou
elimine enkonvegnan sa yo jous nan rasin antan nou fè langaj la
vin fiks epi rijid nèt ale ta vin kont lanati, epi li ta anjandre enkonvegnan ki pi grav toujou. Se pou sa mwen konsidere mantalite
k'ap dirije tantativ "Logisticiens" yo ap fè a tankou yon bagay ki
kontrè totalman a tout filozofi.
Leksik Aristòt ak Sen Toma a sètènman li pa fin apwen
nèt, parapò a presizyon oubyen fasilite; poutan se yon enstriman
estròdinè ki bay prèv li deja epi ki te sèvi pou analiz entelektyèl ki
pi fen yo tankou pou sistèm ki gen plis koerans ak presizyon an:
ebyen, leksik sa a ki sitèlman teknik li gen yon souplès ak yon
fasilite pou l' resevwa fòm (sa yo rele "plasticité") ki fè moun sezi,
epi li ta enposib pou redui l' nan okenn konbinezon mekanik tankou eleman ki fikse yon fwa pou tout. Poutan pa gen okenn tomis
(sa vle di disip Sen Toma) ki ka tronpe l' sou sans nenpòt ki mo
nan nenpòt ki fraz Sen Toma.
Lè yo t'ap tabli tèminoloji yo, premye prensip ansyen yo
te genyen nan tèt yo sèke yo t'ap pale ak yon seri entèlijans, se
dirije pou yo te dirije aktivite entèlijans sa yo, se pa ranplase pou
yo te ranplase aktivite sa a ak yon sign. Epi si ta vin gen konfizyon poutèt yo sèvi ak yon langaj ki pa rijid, Lojik la te la presizeman pou aprann nou evite konfizyon sa yo. Se pou sa yo te
konsidere Lojik la se te yon enstriman indispansab pou konesans
la. Se sa k' fè yo te rive tèlman lwen nan kapasite pou distenge
divès propriyete lojik mo a ka genyen nan propozisyon an (tankou
suppositio, ampliatio, appellatio, etc.); lojisyen modèn yo neglije
etid sa yo yon fason sovaj. Difikilte ak sechrès Lojik la, pou ansyen yo, se te pri yo te dwe peye pou yon richès ki gen valè enfini:
posede yon sistèm sign materyèl ki kapab vlope panse imateryèl la
a chak moman paske li pa rijid (menm si se yon fason ki pa janm
fin apwen nèt, li deja ase pou travay entèlijans la).
Menm jan okenn aranjman lyezon mekanik pa ka konpòte
l' tankou yon òganism vivan, jan Driesch te demontre a, konsa tou
okenn aranjman mekanik sign yo pap janm ka koresponn ak lavi
entèlijans la. Li bezwen yon sistèm sign lib epi maleab, ki dwe
gen posibilite konbinezon san fen epi poutan ki konsistan (ki rete
kanpe ansanm). Yon sistèm sign konsa, se inevitab pou pafwa li
gen kèk feblès, paske presizeman se ak eleman materyèl l'ap imite
mouvman espri a.
Sètènman li bon pou eseye jwenn yon remèd pou feblès sa
yo epi fòk nou di tou nan filozofi modèn nan, kontradiksyon nan
mo yo ak lage yo lage brid lang nan vin tounen yon kalamite tout
bon vre. Men sèl mwayen pou ta rive fè vokabilè filozofik la vin
inifye epi stabilize dapre sa lanati pèmèt epi mande, se ta vin redekouvri yon group konviksyon fondamantal, ki ta sanble ak sa refleksyon nan Mwayen-Aj la te genyen an pandan kèk syèk, malgre
te gen yon pakèt ekòl byen opoze ki t'ap pouse.
V.- Refleksyon sa yo mwen sot fè yo eksplike poukisa mwen pa
gen anpil konfyans nan yon Kongrè filozofi nan sans ou panse fè l'
la. Men, dapre mwen, si l' ta byen òganize, li ta kapab itil si omwen li ta oblije filozòf yo pran konsyans danje a pi byen antan li
fè yo presize pakèt sans kèk mo genyen, tankou sa ou bay egzanp
yo. Mwen pa bliye "Société française de Philosophie" deja pran
inisyativ pou li pibliye yon vokabilè filozofik. Malgre se yon
travay ki fèt ak anpil atansyon epi ki ka rann anpil sèvis, pèmèt
mwen fè remake sa li plis montre se difikilte ki kanpe obligatwaman nan rout yon travay konsa, e difikilte sa yo ogmante poutèt
filozòf modèn yo pa okouran bèl presizyon ak klarifikasyon tradisyon skolastik la te mete nan vokabilè filozofi a.
haut de page